တဏှာ

ကျနော် ကံမကောင်းစွာ
မိန်းမတယောက်ကို တွေ့ဖူးတယ်
အဲဒီ မိန်းမက ဆွဲအားပြင်းတယ်
အဲဒီ မိန်းမ ဘယ်လိုလဲဆိုရင်
လက်ပြတ်နေတဲ့ ဗီးနဗ်စ်ထက် ပြည့်စုံတယ်
မြောက်ကျွန်းသူထက် မြို့ဆန်တယ်
သူ့ကို မြင်လိုက်တဲ့ ယောက်ကျား
ဖျင်းကနဲ  ဖြစ်သွားစေရမယ်

နောက်ပြီး အဲဒီမိန်းမက
သရက်ဥယျာဉ်ထဲက အမ္ဗပါလီ လည်း မဟုတ်ဘူး
ပါရီမြို့က နာနာ လည်း မဟုတ်ဘူး
လေဒီချက်တလေ လို အလုပ်သမားတယောက်ထဲနဲ့လည်း မဟုတ်ဘူး
အဲဒီ မိန်းမက ပြည်ကြီးရဲ့ အဆင်တန်ဆာ
ပြည့်တန်ဆာလည်း မဟုတ်ဘူး

ဒါပေမယ့်
အဲဒီ မိန်းမရဲ့ ရင်သားပေါ်မှာ
ပရောဂျက် တစ်ဂျက်
အဲဒီ မိန်းမရဲ့ တင်ပါးပေါ်မှာ
အန်ဂျီအို တစ်အို
ချက်တွင်းနက်နက် ဗိုက်သားပေါ်မှာ
အမတ် တစ်မတ်
ပေါင်တန်ရှည်ရှည်ပေါ်မှာ
ခေါင်းဆောင် တစ်ဆောင်
လက်ကတီး ဂျိုင်းကြားမှာ
လူဖြူ တစ်ဖြူ
ဒူးခေါက်ကွေးမှာ
တိုင်းရင်းသား တစ်သား
မြီးညှောင့်ရိုးမှာ
စစ်ဗိုလ် တစ်ဗိုလ်

အဲဒီ မိန်းမကို ကျနော် အထင်မသေးပါဘူး
သူ့ရုပ် သူ့ရည် လှနေတာ အထင်သေးစရာမှ မဟုတ်တာ
ကျနော့် မိခင်နဲ့ မျိုးတူစု တစုထဲပဲဟာ
အဲဒီ မိန်းမမှာ နိုင်ငံမှ မရှိတဲ့ဟာ
အဲဒီ မိန်းမဟာ
မိန်းမပျက်မဟုတ်ပါဘူး
ယောက်ျားပျက်တွေနဲ့ ဆက်ဆံနေသူသာ ။           ။

နေနွယ်
နေ့သစ် (http://www.naytthit.net/?p=26885)

၇ မေ ၂၀၁၂

Leave a Reply

Copyright © 2012 အိုးဝေမျိုး · All rights reserved · Designed by Theme Junkie
Powered by WordPress